Zingrotra Vānao:
Zingrotra\[ vānao hi āwui ākhon kakhong āthishurda vānao chiwui āmingla chi hopapama. Vānao hiwui khararchān khararnaobingna hāngchithei marontā kahai hithāda leiya.
Atam ākhali sāyur-vāyurbing tara̱ mangkhavai ra̱khong khonsada chān ngazek ngarok iji. Chieina saikorana mayāda ra̱khong hi khonkhuisa chihao iji kala ra̱khong kakhonli saikora rāzangser phalungrakho makharāpā chile mamaya marakhoda ngazek ngarok haoiji.
Chieina langchin sākahai ātam rāuda sāyur-vāyurbing saikora ichichāwui ngalang khuishok ngaroklaga ra̱khong kakhon rāserda athumwui tara̱ mangkhavai ra̱khong chi khonkhui haoiji. Khonkup kahai eina sāyur-vāyur rāserkā marāserma khalada mashing shānkhayang eina Zingrotra̱ vānao hi mazangsāthu iji.
Sāyur-vāyurbing saikorana mayāda ra̱khong khonsada khonhaira kha Zingrotra̱ vānao hina sāyur-vāyurbingna ra̱khong khonsada mayā ngarok hailaga makharā wuivang Zingrotra̱li ra̱khongwui tara̱ mamang ngasaksada tuitak tāhaoiji. Zingrotra̱va kazing eina rokatā zingrotra̱ manglaga okthuirano chihaoiji.
Khararchān āthishurda sāyur-vāyurbingna chithāda tuitak tākahai leihaoda Zingrotra̱ vānao hiya zingrotra̱ kala thingnāli kakā iknguira̱ kathā manglaga ringada hānga. Kala vānao china "Zingrotra̱, zingrotra̱, zingrotra̱" da marlāk eina kakhong chi tara̱ ra̱chang haoda kazing rotāmiluda kakhongnada āwo-āyiwui khararchān hina hānga.
Source: Khareisui Luikham
Āma̱: https://commons.wikimedia.org/wiki/File:Jacobin_cuckoo_or_pied_cuckoo