Open Site Navigation

Tāngkhul Ngashan

Mayak kapimihai sāhuili, sheithuihao fa̱na.

Sheithuihāi‘la Tāngkhul ngashan shongzā mashimānma.

Mashimānma phanit-phanao, sāri, pheichak, hao lā.

Zingkum-Luiyao chithei wonshivār, shiri-shirāna.

Chitheimi kazing kakum ākha̱-ākhaowui khonna.

Chāngthit-chāngwok ‘tamli yangda Tāngkhul’ chāngshān sāsā.


Mimao rā kameo' nada kung-kung gang-gang homshoksā.

har ‘khari rān harshāngli, Shātshingāt rāpaishina.

Thing ‘mazuk āmachut vāng, shimsaksā yao, shim sākha.

Ngalā hāngsan chiho, kapā yangsangmi, ra̱sa̱ ‘phā.

Mikumo bichār marar, Rihai makei ngasaksā.

Pha̱ham, āmeo’ shākhi, thirehao khayona mina.


Tāngkhul ngashan phārisa khawon-kashon’ ngasharda.

Āwo-āyi pheichon, ithumwui lan kajun khuisa.

Mangā rām-rām khuisa makhunda ot kasā eina.

Thang-thang shuk-shuk, ran-ran, wortamrinli mangā khuisa.

Tāngkhul ngashan ngayoyang vaira̱no yur kateina.

Tāngkhul ngashanna reimei, chuimei, phāmei, yāmeisa.


Kapime: Phayam Raleng


Kapimewui kharin

Kapimena khare pārāli Tāngkhul āwo-āyi okthotli ngashan hi kathāda leisā kala Varivarāna semkahai themsakli ngashiklaga thingphun-luivāt, phanit-phanao ātam kathāda machut khuida mayonsā, okthuisā kaji hi khani-ākha hāngchithei haidalei. Kakhane pārāli Haona shitkasang kala sākasā shārpahor kaikha kala riyan, shiyan-chikān kathāda mayonsā kaji teomeikha lāsem hili kapi haidalei. Tuikup pārā chili kapimena kasirda Khanuithot ithumna Haowui shānglāk kahai ngashan hi lan ākhanada khuilaga mathāda phārisa kaji hi pohaidalei.


Kakapi ārā: lāsem hi pārā kathumna kala pārā āvavali tuipeng tharuruk zanga, tuipeng vākatang kachida ‘a’ kala ‘ā’ eina vātangsera. Tuipeng āva̱va̱ hi ākhon (Syllable) tharāda mati (14) eina kapi haidalei.


Kakhalat:

1. Zingkum-luiyao: zingkumwui ālungli khalei zur kachāng, kānrei kachāng, mayo kachāng, māthei haoyāng ātambing hili kahāngna. (different seasons in a year).


2. Har khari kharān: āchālakha kha̱ (village)wui harshāngli/ veikhurli (gate) har pha̱phayāda kha̱ chili kazāt zakkashi marā khavai har-khari kharān chili kahāngna.


3. Shātshingāt: ka̱lāshāt, unshimui.


4. Thing khamazuk: āchālakha mi ākhana shim semura chiakha masemphokrang lakha khamachut sāda kala yāruina theikhavai thinghui henghailaga ātonli ngashee/shiphar khalapshānhailaga shim kayāngli ungshunsang haiya.


5. Shimsaksā: thing vāmazuk thang māthei-māreng, tāngnao, shimkhur meiphungli khayao sā.


6. Rihai: āchālakha ākhon shokhai akha bichār masāmi kharar thārān Rihai kaho lungsem chili lunghailā chi makei ngasaklaga shākhi sāngasaksāya kala khayona pāchi thirihaowa. kha̱ (village) ākhali Rihai ākha leiphalunga.


7. Khawon-kashon: khanuithot.


8. Kajun: pheichon khayun.

0 comments

Recent Posts

See All

Kaphā zingkum khuirāmi, kashi kum notha, Ramung kachiva̱, hon kum khamathā. Samathā ura āmachi sākahai theithā Lingsang ura, kapanga khamatha kathā! Ākhar kharda matekchim āshon shokura, Mayo kachāng,

Zingsho-zingtun, āto-āze malā kāpsang harkho Pāshā yang, āmeoali pha̱, khangheili ramsom. Theimajee-paimajee luithuimi, marun kachāng Luitā phanit mahon-ngapao sāda luitunga. Oh! Zizi-parpar zangura n