Semkāsa
Semkāsa Chuimei Horngasaksa!
Semkāsa! Ithot mamaishipai.
Yonhaira I pheikar mashungkhuisa.
Yangungsa kali kongluihao.
Ngayoyangsa kali vāthao.
Kapeoyangsa kali shimānhao.
Yur semkāsa I mashungkhui fasa,
I mamashung Yur mamashung.
Semkāsa Chuimei Horngasaksa!
Semkāsa! Ithot mamaishipai.
Marāk khuisa Rampho kahai Ngalei.
Khipāvāra luipam samathā khavai?
Āvaramna nali yangda ningzaori,
Ākalā masapha’ Pawung mashuithei k’hon maning.
Muivāsa masanaungpai,
Mangachee Khristana ithumli thāndalei.
Semkāsa Chuimei Horngasaksa!
Semkāsa! Ithot mamaishipai.
Na khisāhaira āvaram ngalei wuivang?
Otsak tam, khamatui tam maning.
Otsak mazang Arema tui.
Semkakā tam Ngakhunkatā tam maning.
Ngahan Imang, Katom Khokha.
Kahorlei khokha kasāli khanuithot.
Semkāsa Chuimei Horngasaksa!
Semkāsa! Ithot mamaishipai.
Wutmi haira āwo-āyi mathingrik,
Yonglu Shangkha thāda ngaphan usa,
Pailu khalāng thāda Chuikhamei Mirin.
Hichingra machipai khamasha mirin,
Karsang usa chuimeida.
Chan’ savairano ithotkha.
Semkāsa Chuimei Horngasaksa!
Semkāsa! Ithot mamaishipai.
Zingthanwo shok uda harvā khong ura.
Khalami haira khaluikham kahai kahor,
Kārshok usa tangkhamang’ Kazing thangrāli.
Shārka usa yarmi kahai thaomei,
Horngasaksa okthui kuimareida,
Ngayo vairano iyur Kahor.
- Songachan Muinao
Kakhalat:
“Marāk khuisa rampho kahai ngalei”
Luimavāsangla herkahai chi vāsangluishitsa kachina, laasem hili hāngda khaleipāna “Rida āwo-āyiwui tamli chingri leishiri khokha yāngkha sāda okthui sāya .Ishi āshi kachi khikha makhaisāmana. Chiwui ātam chi hanungluishit khavai sāusa kachina”.
“Ākalā masāpha’ Pawung masuitheihon maning”
Āvaramna khanuithot ithumli chihānda khaleichi ākalākathā mangasāhaisa (ākalā khuika/singkhuika da sālala masingkhui paimana), Pawung na masuithei honpamda khikha mashaikhuimana honchām haowa. Nali kachihān chi machithāngasak hailu kachina.
“Muivāsa masanaungpai”
Kachihān chi ungshung khavai mangāshong muivālu mahanungluilu kachina.