Rālu Khanuithot
Āwo-āyina phungphāmi kahai ram Tangkhul ngalei ramyoram
Kaphung-kaphā thingnā-rahā matekchimhai Vare Themsak
Kha leikashi suitā mamān sokhamiman malai haida
Kachichāwui ringkaphā phāthuihao.
Rālu rālu oh khanuithot mayar-ngalā
Shivāmnāra shimān haikha
Pheipāng katingda muivāsa mashun lungli
Ngachee khavai maleiluima Krishtana ithumli ngasomira.
Yaoyāng haira ima Tangkhul kathāna ngapai khangarok wui rai
Yur eina yur, jat eina jat chinaongara makhaingarok
Yuishi yangshāt pemting haira Vare khonshāt tāshunglakra
Thākda ningngateilu huimilakra.
Khanui khonna vaoli ima Tangkhul khararnaosan, kathannabing
Thānshokmilu kahorlungli sāngnāhaira tangkhamanghi
Chitheimilu mashun shongfa khokkha sāda semkāluisa
Kaikahai ima Tangkhul ngaleihi.
- Songachan Muinao