Phanit Phanao

Zingsho-zingtun, āto-āze malā kāpsang harkho

Pāshā yang, āmeoali pha̱, khangheili ramsom.

Theimajee-paimajee luithuimi, marun kachāng

Luitā phanit mahon-ngapao sāda luitunga.

Oh! Zizi-parpar zangura nganansang uka.

Ngachān sāri ngavai, chankathuilaa sāda

Mayar-ngalā mayo'tamli yarra shak.

Zamshei-vaitei khapta, kumva-kumzāt heiwun

Ungkhavai marang kachāng mangkhap sai.

Oh! Akha-ākhao laa nganui hishong-chishong.

Pareinaosan yarson kānglup sakhui,

Tham phahor khuida pi kachāng morsonga.

Āchei-ārei, pāngthem, shātshingat'tamli

Longshimli petkha sada tamkhui-shakhui.

Khangam sāshai shaida, ngachān sāri

Peitingri thishamli honrei suida pheison sai.

Shirei, tharazāt chumli rorsang ngaphangzā khavai

Ngaphei kachāng chumpha̱ mayon.

Oh! Tharāzāt nganantāp ningmahairi-ri.

Tāngwui mayarnao kasār-kafa̱ kāshungda

Khalupkhui khayon kachāng longra shak.

Oh! Āwo-āyi thotli kumshirinda ngarang.

-Wungramrin Pharung