Open Site Navigation

Nanana

Nana semkakā maningmalā?

Nanana, ning khamathuk wuivāng.

Nana khangkakhui maningmalā?

Nanana, awor thangmet wuivāng.


Nana khamatui maningmalā?

Nanana, morei sakhangasak.

Nana khamakhao maningmalā?

Nanana, phaningui khangasak.


Nana sakakhai maningmalā?

Nanana, konglui haikhangasak.

Nana makasem maningmalā?

Nanana,suitahai khangasak.


Nana kakatom maningmalā?

Nanana, phaning khuikhangasak.

Nana chishutme maningmalā?

Nanana, ngarankhui khangasak.


-Songathing Lunghār



Summary/kasha eina kachithei:

1. Aruihon khanuithotwui kharing kharakli khayang chitharān thangkhamei kala thuikhamathuk hi darkar salākhaira da theikhui. Lāngmeida tuimāng maningla otsak eina zangkhāng khuida otsin kakhui hi khamataiya ākha sāda darkār sādalei. Khanuithot māng maningla katongkhana hiwui ningrin leilaka ot sasernishi chiva semkakā kala mathuk kakhui hi nawuivāng eina ngasāra.


2. Imayurna mili matui khami kala semkakā maningla sakakhaiwui tuikhayuina chungmeida khamatui hi shoichaohaira. Tui khamatui hi kala tui hi ātha eina ngaraichai. Khamatha matuikha khamatha kharshokra kala zakkashi matuihaikhava zakkashi kharshok papama, chithāda sāda Khamathā tui matuikhavai sāsa. Tui hi āman kasaka ākhana kala hina semkakā chingri ngasakshap khavaiwui pangshap lei. Makhamashung matuida mili morei sākhangasak nawui morei kahakna. Ning matharthei kala khamakhaona pemthada okkathui kala mili katom khangai maleila kathāda ngakhuntara kala ina kathāda ali chuimei khuira kachi hotnā kazatli yaruirin makhao haira thākha hi khipāwui eina kharā khala nawui eina maningkhava? Nawui otsak kala nawui tuimatui chili nganāda yangda mina phaning nguihaikha makhamatha sāda khalei chili nala sharuk kahak khuidalei. Ramnaobing khanganui kala khararthot kāshungda katongkha khamashung tui matuida mashun chili okthuisa.


3. Reisangkapai kala tamkhui kapai ākhanava hina, Imaramva katom katheihi vatlāka. Yangvāda kakatom dārkār kasā theikha theireklaka pairekmihai laka makatommithu̱mana. Katom khamihiva saklak kahai ot maningmana. Nawui sarān nana theikha achichāwui sarān eina tangda masāngai ngarokla mina sākhangayi kasā chili kakatom maningla kathāda awui eina khangui phashokshi khala kachili themshunhai. Makaphā marei marā kasāli thangkhamei shichinhao kha reisangkhavai semkā khavailiva thangmet maleithumana. Yaruirin sākakhai, konglui khangasak kala suita khangasak hili nawui sharuk mazanglikhala thuklak eina machuk ngasakngaiya kala machuk rānhaira. Semkakāli vasākakhaina paimei chithāda sāda kasakpāchi khokkha yangkha sāda hotnakhavai sāusa.


4. Imaram yaruirin reisang haksangda khalei hi nawuivāng eina kharāna. Nana katom khami leishi khami chiwui mangā eina thāk akha chuimeida karka kashaplāka. Nana kaphā otsak sakachithei china mi kachungkhali phaningkhui ngasakuda thuimathuk ngasakhaira chiwuivāng nali ningshi imayurna. Dārkār kasā mi chili nana kathei thangmet ngayarmilu, mazat kathei mi chili zatthei khavai tamilu ana nganingka kahai atam chitharān china nawui ringkapha kala katang makhavai sokhamina. Khamashung kala mashun yaruirin semkā haosa, sharuk khuisa, sākhangayi otchi sāusa. Nathum katongkhali ringkaphā khamashung semkakā ngasarano.


Ningrin: Nana khamashung chili okthuida otsak eina sādaleikhava yaruirin semkakāchi nanana. Nana nguida makhamashung mirin chili ngaphumda leikhava sakakhai kala suita khangasak chi nanana. Khamataiya ningrinva khamatha Yaruirin semkahaosa kachina.

0 comments

Recent Posts

See All

Kaphā zingkum khuirāmi, kashi kum notha, Ramung kachiva̱, hon kum khamathā. Samathā ura āmachi sākahai theithā Lingsang ura, kapanga khamatha kathā! Ākhar kharda matekchim āshon shokura, Mayo kachāng,

Zingsho-zingtun, āto-āze malā kāpsang harkho Pāshā yang, āmeoali pha̱, khangheili ramsom. Theimajee-paimajee luithuimi, marun kachāng Luitā phanit mahon-ngapao sāda luitunga. Oh! Zizi-parpar zangura n