MIRIN
Katung kakā, kashok kazang, ringkaphā ringkashi, oh mirin!
Mathāsek semmihai, phaningla makhuima, Na themsak.
Shokkhare shokkhanao, semmiya, mirin ngatak ngatāda
Chitheimiya ātam kachida, nawui leikashi, nana rākmida.
Sangmiya mikumoli, mikna mathei kharara manglā chi
Mashivāmla sangmi, Naming tekmateivairanu chi.
Kasaka mirin yonda ringkahai,ngwuikahai ngavāya,
Okthuivālo, manglārin makhunsek, nawui mirin peida, sakchanglo!
Āwor tamkhuilo, tamkazazak khuilu mahuināranglakha
Ok’thuivāng sāvairanu nawui ‘man kasaka thangmet.
Nali somi kahai āwor mishoklo, mashivāmlākla.
Nawui thangmet nawui sāri sāvailo, ngararphungli, na yuilākra!
Kahaowa chānhān lāhān khamathā, āchei ārei kathei chi
Chithāla, phākharek sākharek mirinna chungmeihao.
Leishiri,mashitri kahai mirin chungchangkhatna kahao!
Yangkhei kahai, khummi haowa kaji malei, leishimishon ‘tam kachi.
Kashāng kachām, kajui khanem semmithathui mikumo mirin
Ngahomzathao mik khayipkhawui ringkaphā lumkhalao
Kākashung, khavāt makhalei mirin khipā maningchāngra!
Mathāmei shichinsa Varewui lan, shānkhuisa Varewui sokhami.
Mikumo mirin ātāzan khipānakha mathei masingma,
Mangasungrar mikumo pangshapna kathi kaholi.
Ningkharikmeisa, yonda ringkahai mirin mashungkhuisa,
Huinārot, kānthuirot haiya phaningkakhui kaji maleiranglakha!
-Thotrinsem Rainam