Mazirna shongfa̱ kasā makazangwui khararchān

Āchālakha āwo-āyiwui khararchān hiwui āthishurda ātam ākhali thang zimishokha sāyurbing hi āthum zatkhavai shongfa̱ semsada chān ngazek iji. Kala shongfa̱ kasemli makazangpā kala makharābing chiliya shongfa̱li mazat ngasaksada tuitak khuihao iji. Zimiksho chi rāuda sāyur katonga shongfa̱ kasem chili rāhaowa kala shongfa̱ semkup kahai eina khipālong shongfa̱ kasemli marāma khalada khayang eina Mazir hi shongfa̱ kasemli mazangsāthu iji.

Sāyurbingna ngazek kahai āthishurda chithākha Mazirli shongfa̱ kasemli mazang thuda shongfa̱li mazat ngasaksa chihao iji. Kala hithāda khonshi haowada hānga, "Mazir nana kalikhada ngakaishida shongfa̱ hi makān akha nali naithat haorano." Chiwuivang eina chithāda khonshāt leihaoda Mazirna shongfa̱ makān akha naithatzār lāka. Khareliya shongfa̱ khoreili zatakha khikhana Mazirli naiza̱mi haida thihaikasāla theizārlāka.

Source: Khareisui Luikham