Open Site Navigation

MANGKHAP PHANIT

Mangkhap kachi hi khamang khapkahai kachina. Mangkhapwui thili yārui ngapao masāluimana. Yārui ngapao kachiya yārui mahon ngapaoda shimkasā luikhavā, tarung khāngkasang, wonrā kasā, ngalā shakkazā kala khanā kasa hikathāthā hi khaphaowa (Mā mahātkhuirang lakha eina tangda).


Āwo-āyi thotli shimsā luivālala, tarung khāngsanglala, wonrā sālala, ngalā shakzālala kala khanā kasa hikathā kasā saikora hi kiering taithatlaga zamkhorli sā ngapasāya, maphāzāmana. Chieina mangkhap kahona. Phāzāsānijiva “mangzākhap” hora.


Mangkhap phanit hi luishom luisaoli chotlāk eina ot sāhaoda yāng shimān kahai chi chipem khavai ngasāmkhuida phāshak-phāzā kapam phanitna. Mangkhap phanit hili khamataiya ngaronkhangarok hina khamashit-khamano khuirāya. Mangkhap phanitli māthei-māreng khongnainao kala ngasotnaoli ngaronshai-ngaronmanga.


Āni-āwoli, māknao-chinaoli, khongnainaoli, ngasotnaoli khor khuivāmikha “Oh iwui khor hila mangyanglu” da ngaronmang ngarokta āni-āwo, māknao-chinao, khongnainao kala ngasotnao leikashi mataisanga.


Yorlāli sākho mahei khangakān chiya Luirali mangarinrar thuda makhamibing (yorlā) chili mangkhap phanit hili miya. Mangkhap phanit hili kathinao eina kharingnao khongkhai khangarum phanitnada khuiya. Haowui shitkasangli kathinao hi thishām marāranglakha eina tangda āthumwui manglā hi mazatla leifayada khuiya. Chieina kathinao hi māhātkhui hailaga thishāmli zathaora, phanit mazangluimara phāzāt khangarum khanaowanada khuisāya.


Mangkhap Langchin: Hangvbingna shangshang tāngtāngwui luisao-luishom makupura khalada ngathing ngaroklaga mangkhap langchin sāmi. Langchin kasā hi sāngalāngda chingmiya, marama yārui zamkhor hangsang khavai ātam khākshokmiya. Oh ākhama mangkhap sāurakho machipaimana.


Kapime: Honpam Raleng

0 comments

Recent Posts

See All

Āva̱ram Nagalim, yirmayirtei leikashi, Hākhui Varena, Āwui yur sāngasak Shaksāmi matekchim nimshimri ngahongwui lan, Okkashok saikora̱ mathingrik katheng mavai, Mirinlan nganantāp ontha̱mi. Khisā mani