ĀKHOKA
‘Ākhoka’ mingpho mateo mapaima,
Samphanga ‘Ākhoka’, kashura sāda.
Āsho-ālep, maipānna maning
Thāna, tuikhok-tuirei singda.
Theikazak ot mangā āmei-āmā
Āyaonao ‘vāng, ākhoka, singom tantak;
Pawung mathā, mik khanā mathing.
Mayansāng, pheipāng ngavengkong!
Āyaonao ‘lan ngaponkazā malei,
Ā chili kashāng kachām mikyan mazang.
Yāng eina khangasung maleima,
Tuipai tuishui yar masāma!
Tuikhok sing, āyaonao ning ruikhui vai,
Āwui chāngvei mashun makhui eina sai.
Sāmi-vāmi kahai ‘vāng ngachān
Sāpaiser ‘Ākhoka’, hupta.
- Wungramrin P. A