Āchālakha Tāngkhul Mipoka bingwui eina āja̱ ithumwui thot khangachei tārākha leihaira. 

​​

Āwo-āyina nāothotli yartā khamaronwui ngachaili Tui hi sakmatāimeikap kachiya Lan ākhana. Khareli Ithumli āva̱-āvā kala āwo-āyina lumlāk eina meiphungli kala piura kachi ātamli khararchān hiyāyā hangkachithei phaningungda leishishuna kala ningmayunglāka. Āja̱ khawon-kashon tārākha ithumwui Tui (Tangkhul Tui) makashā, mamatui kathei kala makapi kathei tārākha leilākdalei. 

​

Ima Tui eina khararchān kasā, hangkachithei kala tamkachitheili khi chonlo! Ngara̱rik kala tharza eina hāngkashapmāng maningla tamkakhuila tamkhuipaimei ngarokpapama. Iram tui phākhari eina ngasha̱da chikatkakā kaji hi ithumwui kakahāona kala hiwui ningrin eina "ĀVA̱RAMTUI" hi hāokaphokna.